Ұзынағашта қаза тапқан үш жігіт бүгін жер қойынына тапсырылды

Ұзынағаш базарында мал сатып жүріп, қылмыскерлер қолынан қаза тапқан үш жігіт бүгін Алматы облысы Көксу ауданында жер қойынына тапсырылды.

Алматы облысында қаза болған ағайынды жігіттердің туыстары жерлеу рәсімі кезінде қоғамнан қайғылы жағдайды қызу талқыламауды, полицейлерден істі аяғына дейін жеткізуді сұрады.

Жерлеу рәсіміне жақын ағайын туыстардан бөлек аудан мен қала тұрғындары келіп жатты.

«Құрметті бауырлар, әпке-қарындастар, Алматы облысының әкімі Амандық Баталов сіздерге көңіл айтады. Бұл бәріне ортақ қайғы. Қаза болған бауырларымызды соңғы сапарға шығарып салу – бәріміздің міндетіміз. Сабыр етіңіздер», – деді Сарыбаев.

«Қылмыскерлер ұсталды. Оларды жазалауды мемлекет пен құқық қорғау органдары шешеді. Екі азамат ұсталды. Өз басым олардың суреттерін де көрдім. Тергеу бір ғана күнге созылмайды. Мүмкін бір ай не одан да көп болар», – деді Еркін Бейсекеұлы.

Жерлеу рәсіміне “Нұр Отан” партиясы облыстың филиалының бірінші орынбасары Ғалиасқар Сарыбаев, облыстық ішкі саясат басқармасының жетекшісі Рустам Алпысбаев, Көксу ауданының әкімі Алмас Әділ, ардагерлер кеңесінің өкілдері т.б. келді.

baq.kz