Зере анасын іздейді

«Үйден шыққанда баланың жылаған даусын естідім. Көршінің баласы деп ойладым. Сыртта тұрған көлігіме беттегенде жерде отырған баланы байқадым. Күртешесіне хат қыстырылған.

Онда «Аты Зере. Бір жас үш ай. Бір айдан кейін алып кетемін. Ешкімге хабарласпаңыздаршы» — деп орысша жазылған». Бұл туралы бізге Жамбыл облысы Меркі ауылының тұрғыны хабарлады. Атын жасырып қалған азаматша, оқиға Мәншүк Мәметова көшесінде орналасқан үйдің ауласында болғанын айтты. Бір жастан асқан нәрестені белгісіз біреу тастап кеткен. Төтенше оқиға 14 ақпан күні сағат кешкі 22.00 таман орын алған.Үй қожайындары бірден жергілікті тәртіп сақшыларына хабар береді. Олар келіп, көршілерден сұрастырады. Қарама-қарсы үйде бейнекамера орнатылған. Онда жас қыздың 21.48-де қақпадан кіргені көрсетілген. Бірақ түрі көрінбейді. Жол бойында тұрған таксистің бірі көкек ананы Алматы-Ташкент тас жолының бойына жеткізгенін айтқан. Нақты қай бағытқа кеткені белгісіз. Бала бір жастан енді асқан болса да «мама, мама» деп анасын қайта-қайта іздейді.

Елдос Өмірзақ