Заңсыз аңшылық құрғандардың жолы кесілді

Алматы облысының Ұйғыр ауданындағы аң шаруашылығының бірінен винтовкамен, аңшы мылтығымен қаруланған үш ер адам ұсталды. Күдіктілердің жол талғамайтын көлігінен полицейлер елік пен қабанның бөлшектенген етін тәркіледі, деп хабарлайды ҚазАқпарат тілшісі.  «Тексеру барысында анықталғанындай, аңға шыққандарда тек бір қабанды атуға ғана лицензия болған. Ал басқа аңдарды атуға қатысты ұсталғандар қандай да бір рұқсат құжаттар көрсеткен жоқ. Сондықтан да, елікті ату заңсыз болып табылады»,  делінген облыстық ІІД баспасөз қызметі таратқан хабарламада. Полиция қызметкерлері заңсыз аңшылықпен айналысты деп күдік келтірілген тұлғалардан төрт атыс қаруын тәркілеген. Оның ішінде 12 калибрлі бір аңшылық қаруы еш жерде тіркелмеген, яғни заңсыз сақталған қару болып шықты. «Қазіргі күні заңсыз аңшылық жасау фактісіне байланысты ҚР Қылмыстық кодексінің 337 бабы бойынша қылмыстық іс қозғалды. Атылған еліктің тушасы биологиялық сараптамаға жіберілді», — делінген баспасөз хабарламасында.