Қызғанып әйелін өлтірді

Қостанай облыстық мамандандырылған ауданаралық соты әйелін өлтірген Қарасу ауданының 32 жастағы тұрғынына сот үкімін шығарды.

Іс материалдары бойынша, 2016 жылы 6 маусымда Қарасу ауданында ер адам әйелін ен далада күтіп тұрған. Алдын ала болжам бойынша, ол кездесуге шақырған. Ол әйелінің өзіне көзіне шөп салған-салмағанын анықтағысы келген.

«Кездесу барысында ерлі-зайыпты арасында жанжал шыққан. Ер адам қызғаныш салдарынан әйеліне асхана пышағымен тоғыз рет соққы жасаған. Алған жарақатынан әйел адам оқиға орнында есін жимастан қайтыс болған», –  делінген облыстық сот баспасөз қызметінің мәліметінде.

Сот айыпталушыны ҚР Қылмыстық кодексінің 99-бабы («Адам өлтіру») бойынша кінәлі деп тапқан. Ол тоғыз жылға бас бостандығынан айырылды, жазасын қатаң тәртіптегі колонияда өтейтін болады.

kaz.tengrinews.kz