Үш адам ыстан уланды

Шығыс Қазақстан облысы, Глубокое ауданында ыс тиіп уланған үш адам ауруханаға түсті.

Шығыс Қазақстан облысы төтенше жағдайлар департаментінің баспасөз қызметінің хабарлауынша, Глубокое ауданындағы жер үйде тұратын үш адам: әкесі мен екі баласы пештен шыққан ыстан уланған. 25 жастағы әкесі мен 5 жастағы қызы, 3 жастағы ұлына шұғыл түрде медициналық көмек көрсетіліп, ауруханаға жатқызылды.

«2023 жылдың қаңтарында ТЖД мамандары алдын ала жүргізген профилактикалық рейд кезінде берген ұсыныстар мен нұсқаулықтарға қарамастан олар жарықтары бар пешті пайдаланған. Соның салдарынан оқыс жағдай болды. Департамент қызметкерлері көміртегі тотығымен улану жағдайларының алдын алу үшін жыл басынан бері 36 000-нан астам тұрғын үйді аралап шыққан. Күн сайын өңірде 68 000-ға жуық тұрғынға нұсқаулық өткізілді», — деп хабарлады облыстық төтенше жағдайлар департаментінің баспасөз қызметі. Жер үйлердегі пештен ыс көбінесе мұржаны уақытылы тазаламаудан, жарықтардың пайда болуынан шығады дейді мамандар.

JQ-Aqparat