ҰБТ-ға дайындайтын орталықтың директоры ұсталды

Алматыда жоғары сынып оқушыларын ҰБТ-ға дайындайтын білім беру орталығының «директоры» алаяқтық жасады деген күдікке ілінді. Бұл туралы еліміздің ІІМ ресми интернет ресурсы мәлімдеді.

Құқық қорғау органдарының мәліметінше, ол түлектердің ата-анасын алдап, ондаған миллион теңгені жымқырған. 22 жастағы жігіт өзін жоғары сынып оқушыларын ҰБТ-ға даярлау орталығының «директорымын» деп таныстырып, ата-аналардың сеніміне кірген.

«Келісімшарт талаптары бойынша ата-ана 238 мың теңгені бөліп төлей алатын болған. Бұл ретте «мұғалім» бала тестілеуден өтпесе, кепілді ақшаны қайтаруға уәде берген. Оқу орталығын құрушы зым-зия жоқ боп кеткен, уәде етілген сабақты оқи алмаған балалардың ата-анасы полицияға жүгінді. Алматы қаласы Медеу аудандық полиция басқармасының бастығы Ілияс Өмірсеріков бұл факт сотқа дейінгі тергеп-тексерудің бірыңғай тізіліміне Қазақстан Республикасының Қылмыстық кодексiнің 190-бабының 3-бөлігі («Алаяқтық») бойынша тіркелгенін атап өтті.

JQ-Aqparat