Таблиғшы алтылық қолға түсті

Жақында атыраулық құқық қорғаушылар лаңкестерді дайындап шығарушы алғашқы алаң саналатын «Таблиғи Жамағат» экстремистік ұйымының ілімін таратушыларды қолға түсірді.

Атырау облысы дін істері басқармасының хабарлауынша, ұсталған алты таблиғшы өткен жылдың қараша, желтоқсан айларында Атырау, Маңғыстау, Қызылорда және Оңтүстік Қазақстан облыстарында адам санасын улайтын идеясын таратумен айналысып келген.
«Экстремистік ұйымға кіргендер Алматы және Шығыс Қазақстан облыстарынан келген. Дінге жаңа бет бұрғандармен, бейтарап азаматтармен арада тұрғылықты мекен-жайларында жиі кездесу өткізіп тұрған. Кейде тіпті, мешітке келген жамағаттарды да өз араларына тарту фактілері байқалған. Улы идеяны ұстанушылар осындай насихатын Атырау өңіріндегі Жылыой және Индер аудандарында да өткізбек болған. Олар қаңтар айында қолға түсті. Қазір тергеу жүріп жатыр» делінген жоғарыда аталған дін істері басқармасының хабарламасында.
Ұсталғандардың тұрғылықты жерін тінту кезінде олардан ел аумағында таратуға тыйым салынған түрлі әдебиеттер табылды. Бұл алтылықтың бұған дейін Үндістан, Пәкістан, Қырғызстанда болып, арнайы дайындықтан өтіп келгендерін де айта кеткен жөн. «Меймандарға» жергілікті таблиғшылар бар жағдайды жасапты. Тергеудің құпиялылығына байланысты, олардың есімі аталмай отыр.

Баян ЖАНҰЗАҚОВА