Әскери бөліммен ауылды байланыстыратын көпір опырылды (Фото)

Алматы облысының Қарой ауылында тірегін су шайып кеткен көпір опырылып түсті. Бұл туралы аудандық ТЖ бөліміне сілтеме жасап Tengrinews.kz тілшісі хабарлады. Көпір ауылды әскери бөліммен байланыстырады.

18 мамырда таңғы 9.25-те Іле аудандық ӨБ-3 бөліміне Қарой ауылдық округінің әкімінен ауылда көпірдің опырылғаны жайлы хабар келіп түскен. Оқиға орнына аудандық ТЖ, аудандық ІІБ, прокуратура және әкімдік басшылығы барды.

«Оқиға орнына келгеннен кейін тірегін су шайған көпірдің бір жағының опырылғаны анықталды. Абырой болғанда, ешкім зардап шекпеді, қаза болғандар жоқ. Қаскелең өзенінің үстіндегі көпір темірбетон плиталарынан және тіректерінен жасалған. Көпір кеңес үкімет кезінде, шамамен 1980 жылдары салынған», — деді Іле аудандық ТЖ басшысы Анаят Мәсімов.

Сонымен қатар, шенеуніктер уақытша көпірдің салынатынын айтты. Бұл деректі аудандық прокутура ерекше бақылауға алды.