Шыңжанда теракт болды

Қытайдың Шыңжаң Ұйғыр автономиялық облысына қарасты Хотан аймағының Пішән ауданында кеше, яғни 14 ақпан күні қытай уақытымен кешкі 19:20 мөлшерінде теракт болды.

Хотан аймақтық әкімшіліктің ресми сайты жазған мәліметке негізделсек, пышақпен қаруланған 3 адам Пішән ауданындағы тұрғын үй маңында жүрген жай халыққа тұтқиыл шабуыл жасаған.

Қылмыскерлердің бейқам сәтте жасаған шабуылынан 5 тұрғын қайтыс болып, тағы 5 адам ауыр жарақатпен ауруханаға түскен. Жедел іздестіру қызметінің жасақтары әлгі 3 қылмыскерді оқиға орнында атып өлтірген.

Осынау шұғыл жағдайдан кейін, аудандағы үлкенді-кішілі базарлар мен дүкендер, қонақ үйлер, өзге де әлеуметтік қызмет көрсету орталықтары түгелдей жабылған. Полиция қызметкерлері аудан халқынан үйден беталды шықпауды, елді дүрліктіретін жалған ақпараттар таратпауды ескертіп, жұртты сабырға шақыруда.

Пішән ауданында қазір жағдай тұрақтанып, қажетті жедел тергеу-тексеру жұмыстары жүргізілуде, – деп жазады жергілікті әкімшілік сайты.

baq.kz