Шам ұрлағандар 7 жылға сотталуы мүмкін

Қалалық ІІД-нің мемлекеттік тіл және ақпарат басқармасының басшысы Софья Әнуарбекқызыны елордада шам ұрлағандар туралы «Жас қазаққа» мынадай түсінік берді:

«Ұсталғандар Ақмола облысының тұрғындары. Сол жерде жұмыс істеген. Брусчатка салған. Жұмыс істеп жүріп, екеуі көше шамын көреді. Сөйтіп, оларға шамды сатып, пайдаға кенелу туралы ой келеді. Бірінші күні үш-төрт шамды алып кетеді. Келесі күні тағы 4-5 ұрлайды. Солай ұрлық жасап, екі аптаның ішінде олар 51 шамды алып кетеді. Бәрінің құны – 1 млн. теңге. Жедел іздестіру шарасы барысында олар анықталып, қолға түсті. Анықталғаны, олар әлгі ұрланған шамдарды метал сатып алатын орынға өткізіпті. Шамдар түгел сол жерден тәркіленді. Шамдармен қоса оны бекітетін қондырғыны сатыпты».

С. Әнуарбекқызы бұл факті бойынша «Ұрлық» бабымен қылмыстық іс қозғалғанын хабарлады. Құзырлы мекеме басшысы: «Осы баппен қаралатын жаза – 1 мың айлық есептік көрсеткіш көлемінде айыппұл салынады немесе 7 жылға дейін бас бостандығынан айрылады» деп түсіндірді.

Төлен Тілеубай,

Астана