Үш ел президенттері халықаралық күн тәртібіндегі маңызды мәселелерді талқылады

Ресей және Түркия басшылары Елбасы Нұрсұлтан Назарбаевты Қазақстан Республикасы Тәуелсіздігінің 25 жылдығымен құттықтап, еліміздің ары қарай өркендей беруіне тілектестіктерін білдірді. Бұл туралы Ақорданың баспасөз қызметі хабарлайды.

В.Путинмен әңгіме барысында алдағы Жоғарғы Еуразиялық экономикалық кеңес отырысы мен ЕҚЫҰ саммитіне дайындық мәселелері талқыланды. Ал Түркия Президенті Р.Т.Ердуан ағымдағы жылдың 12 желтоқсанына Астанаға жоспарланған сапарын кейінге қалдыруына өкініш білдірді. Сондай-ақ Түркия басшысы алдағы уақытта Қазақстан Республикасына келуге дайын екендігін жеткізді. Ресей және Түркия президенттері Мемлекет басшысымен өңірлік және халықаралық күн тәртібіндегі маңызды мәселелерді талқылады. Ресей және Түркия көшбасшылары Сирияда қақтығысып жатқан тараптар арасында бейбіт келіссөздерді Астанада өткізуге қызығушылық білдірді. Елбасы бұл бастаманы қолдап, Қазақстан астанасында мұндай келіссөздер жүргізуге арналған алаңның дайын екендігін мәлімдеді. Сондай-ақ Нұрсұлтан Назарбаев Қазақстанның Сириядағы қақтығысты бейбіт жолмен реттеуге бағытталған халықаралық іс-әрекеттерді қолдайтынын атап өтті.