Селфи үшін сотталып кетті

Полиция қызметкерінің УАЗ маркалы көлігінің төбесіне шығып, селфи жасамақшы болған Павлодар қаласының тұрғыны опық жеді.

Сәтті кадр үшін осындай қадамға барған тұрғынға қатысты іс Павлодар қалалық әкімшілік сотында қарастырылды.

Іс материалдарына сүйенсек, 23 жастағы Бекзат Ашуов көңіл көтеріп, полицей көлігінің фонында селфи жасамақшы болыпты. Жас жігіт алдымен УАЗ көлігінің капотына, кейін төбесіне шығып алған. Ол аздай, шағымданған тұрғындарды балағаттаған. Сот отырысында айыпталушы кінәсін толық мойындап, осындай әрекетке баруға «тентек су» себепкер болғанын жеткізді.

Павлодар облыстық сотының баспасөз хатшысы Әйгерім Сүлейменованың айтуынша, Бекзат Ашуов ұсақ бұзақылық жасағаны үшін сотталды.

«Бұзақылық жасап, тұрғындарды балағаттағаны үшін 23 жастағы азаматқа 10 күнге қамауға алу түрінде жаза тағайындалды. Айта кетерлігі, бұған дейін павлодарлық әкімшілік жауапкершілікке тартылмаған», — деп хабарлады Әйгерім Сүлейменова.

Baq.kz сайты хабарлағандай, Прокурор А. Махватованың қорытындысына сүйенсек, айыпталушыға қатысты жаза жеңілдетілген.

«Осындай шешім қабылдауға айыпталушының кінәсін толық мойындағаны сеп болды. Бұл соттың оң шешім қабылдауына әсер етті», — дейді прокурор.