Рыбакина әлемнің бірінші ракеткасымен күш сынасады

Осы күнде АҚШ-та Индиан-Уэллс WTA 1000 турниріне қатысып жатқан қазақстандық теннисші Елена Рыбакина жартылай финалға жетті. Ертең ол әлемнің бірінші ракеткасы поляк Ига Швентекке қарсы кортқа шығады. Ширек финалдық сайыста чех қызы Каролина Мухованы ұтқан Елена бұл турнирдің жартылай финалына тұңғыш рет шығып отыр. Ал Ига болса, былтыр осы доданың чемпионы атанды.

Елена мен Ига арасындағы тартыс әзірге қазақстандық тенннисшінің пайдасында. Бұған дейін екеуі үш рет тартысқа түсті, екі мәрте Елена ерлесе, бір рет Ига жеңді. Соңғы рет екі ай бұрын өткен Аустралия ашық чемпионатының іріктеу сынында Иганы біздің қыз ұтқан болатын. «Бәрі де өзіме байланысты, шеберлігімді салып, қателік жасамасам ұтуға болады» деді Елена Рыбакина. Турнирдің жалпы жүлде қоры 8,8 миллион АҚШ долларын құрайды. Бәсі жоғары доданың бәсекесі де қызатыны белгілі. Жерлесімізге сәттілік тілейміз.

JQ-Aqparat