Президент спортшы студенттерді құттықтады

Мемлекет басшысы Қасым-Жомарт Тоқаев қысқы универсиада ойындарында сәтті өнер көрсеткен спортшы студенттерді құттықтады деп хабарлайды JQ-Aqparat akorda.kz-ке сілтеме жасап.

АҚШ-тың Лейк Плэсид қаласында студенттердің қысқы универсиада ойындары мәресіне жетті. Елімізден барған спортшыларға 11 медаль бұйырды.

Мемлекет басшысы студенттердің қысқы аламанында жоғары нәтиже көрсеткен студенттер құрамасын құттықтады.

«Сіздердің жарқын жеңістеріңіз күллі жанкүйер қауымға зор қуаныш сыйлады. Дүниежүзілік қысқы универсиадада сіздер шеберлік пен жеңіске деген ерік-жігердің бірегей үлгісін көрсеттіңіздер. Байрақты бәсекеде жастарымыз ел сенімін ақтап, алтын, күміс және қола медальдарға ие болды. Спортшыларымыздың мұндай жоғары нәтижеге қол жеткізуіне жаттықтырушыларымыз елеулі үлес қосты. Елімізде бұқаралық және балалар спортын дамытуға барлық жағдай жасалып жатыр. Құрама командамыздың Универсиада ойындарындағы тамаша өнері мыңдаған жасты жігерлендіріп, жеңістерге бастайтыны анық» деді президент Қ.Тоқаев құттықтау хатында.