Президент шахматты дамыту жайында әңгімелесті

Мемлекет басшысы Қасым-Жомарт Тоқаев әйелдер арасында халықаралық гроссмейстер, талантты шахматшы Астана қалалық шахмат федерациясының құрметті президенті Динара Сәдуақасованы қабылдап, осы саланы дамыту жөнінде әңгімелесті.

«Мемлекет басшысына Динара Сәдуақасова елімізде шахматтың танымалдылығын арттыру үшін атқарылып жатқан жұмыстар және келешектегі жоспары жөнінде баяндады. Оның айтуынша, балалар арасында шеберлік сағаттары мен квалификациялық турнирлер ұдайы ұйымдастырылып тұрады. Президент Динара Сәдуақасованы былтыр жыл соңында Алматыда өткен әлем чемпионатында шахматтың рапид түрінен күміс медальға қол жеткізуімен тағы да құттықтап, шахматшыларға мемлекет тарапынан жан-жақты қолдау көрсетілетінін атап өтті» деп хабарлады Ақорданың баспасөз қызметі. Сәуір айында Астанада шахматтан әлем чемпионаты өтеді. Президент Сәдуақасоваға осынау дүбірлі додада топ жаруына тілеулестік білдірді.

JQ-Aqparat