Пойыз бен көлік соқтығысты: 3 адам мерт болды

Ақмола облысындағы теміржол өткелінде көлік апаты орын алды деп хабарлайды Қазақстан темір жолының баспасөз қызметі. 20 ақпан күні таңғы сағат 6:45-те Ақмола облысының Бурабай – Шортанды учаскесінде автомобиль жүргізушісі бағдаршамның қызыл белгісіне тоқтамай әрі шлагбаумның жабылғанына қарамастан теміржол өткеліне шығып кеткен. Төтенше жағдай оқиғасы адам өліміне әкеп соқтырды. Жеңіл көліктің жүргізушісі мен екі жолушысы қайтыс болды, тағы үш адам ауруханаға жеткізілді.
ҚТЖ баспасөз қызметі оқиға орын алған кезде өткелдегі белгі дұрыс жұмыс істеп тұрғанын, кезекші де орнында болғанын жазды. Қазақстан темір жолы автокөлік жүргізушілерге теміржол өткелінен өту кезінде аса сақ болып, жол қозғалысы ережесін мұқият сақтауға шақырды.

JQ-Aqparat