Он екі жылдық білім беруде 12-сынып болмайды

Он екі жылдық білім беруде 12-сынып болмайды. ҚР Білім және ғылым министрлігінің мәлімдеуінше, 5 және 6 жастағы балалар үшін нөлінші сынып енгізіледі. Осылайша, 12 жылдық білім беру схемасы 0+11 сынып қағидаты бойынша енгізіледі.

Бұл 12 жылдық білім беру схемасын енгізу осы жылы немесе келесі жылы емес, тек 2019 жылғы қыркүйек айынан басталады деп жоспарлануда.

Ата-аналар 0-ші сыныпқа (мектепалды даярлық) баланы не 5 не болмаса 6 жастан бастап беруге құқылы. Тиісінше, 1-сыныпта 6 және 7 жастағы балалар оқитын болады.

«Білім туралы» ҚР Заңына сәйкес, бүгінгі күні бұл норма қолданысқа енгізілген. Барлық балалар мектеп алды даярлық бағдарламасынан өтуі тиіс.

12 жылдық білім берудің негізгі мәні 0-ші сыныптарға (мектепалды даярлық) бірыңғай үлгілік білім беру бағдарламаларын енгізуде. Мектепалды даярлықтан өту мүмкіндігі білім беру мекемелерінің 0-ші сыныпты ашу дайындықтарына қарай, мектептерде де, сондай-ақ, мектепке дейінгі мекемелерде де сақталады.

Жаңа бекітілген Мемлекеттік жалпыға міндетті білім беру стандартын өзгерту жоспарда жоқ. Алайда, мектепалды даярлықтың бірыңғай үлгілік білім беру бағдарламасын бекіту және енгізу жоспарлануда.

Бүгінгі күні 0-ші сыныптағы балаға апталық жүктеме вариативті бөлімді қосқанда 22 сағаттан аспайды деп жоспарлануда.

Осы жылы кадрлар дайындау процесі басталады.

Жоғары мектепте (10-11 сыныптар) пәндерді бүгінгі күнгідей, қоғамдық-гуманитарлық және жаратылыстану-математикалық бағытқа бейіндеу сақталады.

bilimnews.kz