Оқушылар үшін өз өмірін қауіпке тіккен полицейлердің суреті жария болды (фото)

Мектеп оқушылары мінген автобус апатқа ұшырамас үшін КамАЗдың астына түсіп, өз өмірлерін қауіпке тіккен павлодарлық полицейлер Мұрат Нұрсеитов пен Баянбек Жүнісов суреті жария болды. Бұл туралы NUR.KZ хабарлады.

Естеріңізге сала кетсек, Павлодарда Баянауыл аудандық полиция бөлімшесінің аға сержанттары қызметтік көліктерімен шаңғы жарысына бет алған оқушылар мінген автобустың жанында еріп жүреді. Трассада КамАЗ автокөлігі қарсы бағытта шығып қалып, тәртіп сақшылары балаларды құтқару үшін көліктерін бұрып жіберген.

Жол-көлік апатының салдарынан 39 жастағы аға сержант Мұрат Нұрсеитов түрлі жарақаттармен Павлодардағы ауруханаға жеткізілді. Ол қазір жансақтау бқлімінде ес-түссіз жатыр. Дәрігерлер полицейдің халі мүшкіл екенін айтуда. Сондай-ақ, оның әйелі мен үш баласы бар екені анықталды.

Ал оның әріптесі Баянбек Жүнісов емханаға барудан бас тартқан.

Мектеп автобусының ішінде болғандардың ешқайсысы зардап шеккен жоқ.

Аталмыш факт бойынша арнайы тергеу амалдары жүргізіліп жатыр.