Министрлік аймақтық БАҚ-ты дамытуды қолға алмақшы

 
Қымбатты достар, бүгін біздің министрлік ұйымдастырған аймақтық БАҚ форумына қатыстым. Жиын барысындағы алғашқы панелдік сессия қазақстандық медиа-нарықтағы дағдарыс-менеджментке арналды, деп жазды ҚР ақпарат және коммуникациялар министрі Дәурен Абаев өзінің фейсбуктегі парақшасында.

Ақпарат және коммуникациялар министрі Дәурен Абаев аймақтық БАҚ форумында өз ведомствосының ұстанымы туралы мәлімдегенін айтты.
«Алайда, талқылау барысында жергілікті баспасөзді дамытудың қордаланған проблемалары да сөз болды. Оның ішінде, облыстық газеттердің тағдыры мен оларды жекешелендіру мүмкіндігіне қатысты министрліктің ұстанымына тоқталдым. Бұл мәселеге қатысты дүйсенбі күні облыстық әкімдіктермен және аталған басылымдардың редакторларымен селекторлық кеңес өткізіп, көп болып кеңесе отырып, тиімді шешімге келу жөнінде уағдаластық», – деді ол .
Жиын барысында министр қатысушылардың ұсынысы мен министрліктің аймақтық БАҚ-ты дамыту бағдарласын әзірлейтіндігін жеткізді.
«Форумға қатысушылар нақты аймақтық медианы дамыту мен қолдау мәселелерімен айналысатын қоғамдық бірлестік құру жөнінде ұсыныс көтерді. Біз аталған мәселені қарастыратын боламыз, мен бұл жөнінде тапсырма бердім.Сонымен қатар, министрліктің аймақтық БАҚ-ты дамыту бағдарламасын әзірлеуді көздеп отырғанын хабарладым. Бұл жаңалықты аудитория қуанышпен қабылдады. Тұтастай алғанда, талқылау белсенді түрде өрбіді. Бұдан әрі болатын екі сессияға қатысушылар үшін пікірталастың табысты өтуіне тілектеспін», – деді басшы.