Мешiтте уағыз орысша айтыла ма?

Қазiр мешiттерде уағызды орыс тiлiнде де оқу мәселесi қарастырылып жатыр. Бiрақ әлi шешiм қабылданған жоқ.  Бұл туралы бүгін Астанада дiн iстерi және азаматтық қоғам министрi Нұрлан Ермекбаев хабарлады.  

Ол осыған орай, «Мешiтке келетiн жамағаттың барлығы имамдардың қазақша, арабша оқып жатқан уағызын түсiнбейдi. Тек қана қала тұрғындары емес, ауылда тұрып жатқан қазақтардың көбiсi түсiнбейдi. Өйткенi дiни тiл мен тұрмыстық тiл екi бөлек. Дiни тiлдi арнайы оқу керек. Ал қазақша түсiнбейтiндер не iстеуi керек? Олардың дiнге деген қызығушылығы бар, түсiнгiсi келедi» дейдi.

Министрдің пікірінше, мешiтте айтылатын мәселелердi түсiнбейтiндердiң деструктивтiк ағымдардың жетегiнде кету қаупi де бар. Өйткенi мұндай ағымдардың өкiлдерi қазақша да, орысша да сөйлей бередi.

«Сондықтан олар жастарды өздерiне тартып алады. Бұл қоғамға жақсы ма? Жақсы емес.  Сондықтан Қазақстан Мұсылмандары дiни басқармасының ресми жақсы бiлiм алған имамдарының барлық азаматтарға ой-пiкiрлерiн жеткiзуiн қамтамасыз етуiмiз керек. Мешiттерге тек қазақтар емес, басқа ұлттардың өкiлдерi де келедi. Осы мәселе көтерiлгендiктен, оны қазiр қарастырып жатырмыз, бiрақ әлi шешiм қабылданған жоқ. Мүмкiн, кейбiр өңiрлерде ғана болатын шығар. «Барлық мешiттерде енгiзу керек» — деп ешкiм айтқан жоқ», –  дейдi Н. Ермекбаев.