Мемлекет кәсіпкерлікті ұзақ мерзімге қолдайды

Елімізде шағын және орта кәсіпкерлікті дамытып, қолдау стратегиясы ұзақ мерзімге бағытталған. Сегізінші сайланған Парламенттің бірінші сессиясында сөйлеген сөзінде Мемлекет басшысы Қасым-Жомарт Тоқаев бұл мәселеге де тоқталды.

«Жалпы шағын және орта кәсіпкерлікті қолдау саясаты мемлекетіміздің ұзақ мерзімге арналған тұрақты стратегиясына айналуы керек. «Ақ жол» партиясы шағын және орта бизнесті дамыту экономиканы монополиядан арылту туралы үнемі айтып жүр. Партияның мәжілістегі депутаттары осы жұмысқа өз үлестерін қосады деп сенемін. Сондай-ақ кәсіпкерлердің бастамасымен құрылған «Respublica» партиясы парламентке өтті. Бұл ұйым бизнестің дамуына қолайлы жағдай қалыптастыруға атсалысады деп ойлаймын.

Тағы бір өзекті мәселеге назар аударғым келеді. Заңдар мен түрлі ережелерді әзірлеген кезде қаржы өнеркәсіп топтары ірі бизнес өкілдері шешім қабылдауға зор ықпал етеді. Ашығын айтсақ бұл барлық елге, тіпті дамыған мемлекеттерге тән жағдай. Бірақ осы үдерісті қоғамнан жасырмай заңмен реттеу керек. Әйтпесе жемқорлық белең алады. Өркениетті елдерде саясат жабық есік жағдайында, астыртын жасалмайды. Сондықтан лоббистік қызметті заңмен реттеудің жәіне оған заңмен бақылау жасаудың халықаралық тәжіриесін зерттеу керек», – деді Президент.

JQ-Aqparat