Мұхтар Тайжан министрге: Қазақ тілді жастар сізді түсінбейді

Бүгiн Астанада өтiп жатқан «Қазiргi кезеңдегi экстремизм мен терроризмнiң алдын алу мен жолын кесудiң заңнамалық және институционалдық шаралары» алқалы жиында  дiн iстерi және азаматтық қоғам министрi Нұрлан Ермекбаев баяндамасын орысша жасады. Басқоуда сөз алған қоғам белсендiсi Мұхтар Тайжан осыған назар аударып, орысша сөйлеген министрге өзiнiң тiлегiн жеткiздi.

Ол «Жаңа тағайындалған министр Ермекбаев мырза, ойларыңызды дұрыс айтып кеттiңiз. Бiрақ, менiң ойымша, жаңа идеология, жаңа ойларыңызды тек орыс тiлiнде айтып жүрсеңiз, бүгiнгi жастар сiздi түсiнбейдi. Өйткенi жастардың көпшiлiгi бүгiнде қазақ тiлдi» -деді.

Сондай-ақ ол мешiтте уағыздың орыс тiлiнде жасалуын қаламайтынын айтты. М. Тайжан осыған орай былай деді. «Мешiтте уағыздың орысша болуын мен қаламаймын. Мешiтке баратын жамағаттың 99 пайызы қазақтiлдi. Кеше ғана бұқаралық ақпарат құралдарына «мешiтте орыс тiлiнде де болады» деп айтылды. Онда журналистер дұрыс жеткiзбеген шығар».