«Құлан» неге ақсаңдайды?

Ақтөбе облысының Хромтау ауданында ауыл шаруашылығы саласына қатысты мемлекеттік бағдарламалар тиісті деңгейде жұмыс жасамай келеді. Облыс әкімі Бердібек Сапарбаевтың пайымынша, «Сыбаға», «Құлан», «Алтын асық» секілді бағдарламалар дұрыс орындалмайды.

«Аталған бағдарламалардың жұмыс жасауы үшін жұмыс жасауымыз керек. Сонда ғана жақсы көрсеткіштерге қол жеткізе аламыз», — деді Хромтау ауданына сапары барысында облыс басшысы Бердібек Сапарбаев.

Жалпы, оң көрсеткіштерге қол жеткізу туралы аудан активімен болған кездесуде де сөз болды.

«Тәуелсіздіктің 25 жылдығын үлкен жетістіктермен қарсы алуымыз керек. Хромтау ауданының дамуына өзірі компаниялар зор үлес қосып келеді. Есесіне, ауыл шаруашылығы саласы енжар. Суармалы алқаптарды ұлғайту керек, мал басы санын көбейту керек. Бордақылау алаңдарын салыңдар. Өзімізді ет, сүт өнімдерімен қамтамасыз ете білуіміз керек. Импорт көлемін азайту керек», — деді өңір басшысы.

Сонымен қатар, Б.Сапарбаев жер телімдерін беруге қатысты мәліметтер келтірді. Оның айтуынша, Хромтау ауданында жер кезегінде тұрғандар саны 4 мыңнан асады. Инфрақұрылымды ретке келтіріп, тұрғындарға жер телімдерін беруді тездету керектігі айтылды.