Көшіп жүрген тау

Бірнеше күннен бері таудың сұлбасы қызу талқыға түсіп жатыр.
Алдымен ол «тау» Ұлытау облысының логотипінде пайда болды. Дәлірек айтсақ, байқауда жеңімпаз деп танылған нұсқада.

Әйтсе де, 129 дизайнердің алдын орап кеткен автордың қуанышы ұзаққа бармады. Үздік деп танылған таңбадағы таудың сұлбасын «ғаламтордан көшіріп алған» деп әлемжелі шу ете қалды. IconsDB тегін сервисінен тіміскіленіп жүріп кімнің тауып алғанын ит білсін, бірақ екі тау — егіз қозыдай. Бір-бірінен аумайтыны көзге ұрып тұр.

Таудан шыққан даудан кейін облыс әкімдігі кері шегінді, яғни байқау комиссиясының шешімінің күшін жойды. Сөйтіп эмблема авторы 500 мың теңгеден қағылды.

Мұнымен оқиға бітпейді. Әлгі таудың сұлбасы бүгін Жарма ауданы (Абай облысы) байқауында жеңімпаз атанған логотипке «көшкенге» ұқсайды. Аудандық әкімдіктің Фейсбук парақшасында ауданның эмблемасына жарияланған байқаудың нәтижесін жалпы дауыс беру арқылы анықтады. Дауыс берген 1207 адамның басым бөлігі (61 пайызы) 1-ші нұсқаға, 39 пайызы 2-ші нұсқаны таңдапты.

Міне, ғаламтордың кереметі! Сурет салу үшін шабыт шақырудың да қажеті жоқ. Көшіре салған оңай.

Наргүл Мырзахмет