Колумбиядағы ұшақ жанармайы таусылған соң құлаған

Дүйсенбі күні Колумбияда апатқа ұшыраған BAE Avro ұшағы жанармайы таусылуы себепті құлаған, деп жазады Би-би-си. Жергілікті БАҚ-та ұшқыш пен колумбиялық әуе диспетчерінің диалогы жарияланды. Жазбада ұшқыш электр құрылғыларының істен шығып, жанармайдың таусылуына байланысты бірнеше рет қонуға рұқсат сұрайды. Әуе диспетчері қонуға рұқсат береді. Жазба соңында ұшқыш ұшақтың 2,7 шақырым биіктікте екенін хабарлаған. Дүйсенбі күні ұшақ Колумбияның солтүстігіндегі Медельин қаласы маңындағы таулы өлкеге құлады. Әуежайдың ресми хабарламасында экипаждың қозғалтқыш ақауы туралы хабарлағаны айтылған еді. Сонымен бірге, колумбиялық БАҚ жанармайдың аздығы туралы хабарлады. Франс пресстің Колумбия қарулы күштеріндегі ақпарат көзі ұшақта ешқандай жарылыстың болмағанын, жанармайдың таусылғанын топшылап отырғанын жеткізген. Алайда, жайдан-жай отынның болмауы да күдік тудырады.

ҚазАқпарат