Киік атып еті мен мүйізін сатқан

Қызылорда облысында киікті атып мүйізі мен етін сақтап, тасымалдап қылмыстық жолмен қаржы тапқан тұрғын ұсталды деп хабарлайды Polisia.kz.

Қызылорда облысы полиция департаментінің қызметкерлері жедел-іздестіру шараларын жүргізіп, жойылып кету қаупі төнген, қатары сиреген киікті атқан күдіктіні құрықтады.
Облыс тұрғынының тұрғылықты мекенін тексеру кезінде екі бас киіктің сойылған еті, терісі 36 дана мүйізі, 16-калибрлі аңшы мылтығы мен балтасы айғақ зат ретінде тәркіленді.

Polisia.kz «аталған дерек бойынша ҚР ҚК-нің 339-бабы 3-бөлігінің 2-тармағымен (Өсімдіктердің немесе жануарлардың сирек кездесетін және құрып кету қаупі төнген, сондай-ақ пайдалануға тиым салынған түрлерімен, олардың бөліктермен немесе дериваттарымен заңсыз айналысу) сотқа дейінгі тергеп-тексеру басталғанын, сот сараптамасы тағайындалғанын» мәлімдеді.