Құрлық аламанында алты боксшы алтынға таласады

Тайландтың бас қаласы Бангкокта 22 жасқа дейінгі жастар арасында ерлер мен қыздар арасында бокстан Азия чемпионаты мәресіне жақындап келеді. Қыздар құрлық додасын аяқтап қойды. Қазақ елінен аттанған аруларымыз Азия чемпионатынан 2 алтын, 7 қола медаль иеленіп, жалпыкомандалық есепте 3-сатыға тұрақтады.

Жастар арасындағы Азия чемпионатында 81 келіге дейінгі салмақ дәрежесінде Гүлсая Ержан және 70 келіде Жасмин Қизатова алтын медаль иеленді. Гүлсая финалда тайландтық боксшы Порниппа Чутиді жеңсе, Жасмин өзбек қызы Азиза Зокировадан жеңісті жұлып алды.
Азия чемпионатының 7 қола жүлдесін Мөлдір Тойкова (50 келі), Әнел Сақыш (54 келі), Виктория Графеева (57 келі), Шахназ Исаева (60 келі), Назерке Серік (63 келі), Ақнар Ищанова (66 келі), Дана Дидай (75 келі) олжалады.

Ерлер арасында Азия чемпионатының финалына алты боксшымыз шықты. Олардың ішінде төрт боксшымыздың жолы өзбек спортшыларымен түйіспек. 48 келі салмақта Санжар Тәшкенбай, 54 келіде Нұрсұлтан Алтынбек, 57 келі салмақта Махмұд Сабырхан, 67 келіде Абзал Серік, 71 келі салмақта Сабыржан Аққалықов, 75 келіде Диас Молжігітов Азия чемпионатының алтын медалі үшін ертең айқасады.

Азия чемпионатының қола медалін Талғат Сырымбетов (60 келі), Мұхаммедсабыр Базарбайұлы (63,5 келі), Ерасыл Жәпеков (80 келі), Ерхат Бекзат (92 келі), Аманат Сабырғали (92 келіден ауыр салмақ) еншіледі. Бұл Азия чемпионатына елімізден барған ерлер құрамасындағы 11 боксшымыз медальмен оралады деген сөз.

JQ-Aqparat