Қазақстан – Оман ортасын жалғайтын рейс ашылады

Қазақ аспанында тағы бір әуе компаниясына өріс ашылатын болды. Осы жылдsң 1 шілдесінен бастап Оманның «Salam Air» әуекомпаниясы Маскат – Алматы бағыты бойынша тікелей рейстерді орындамақ.

«Халықаралық рейстердің санын ұлғайту, сондай-ақ «ашық аспан» режимін іске асыру жөніндегі Мемлекет басшысының тапсырмасын жүзеге асыру шеңберінде ҚР ИИДМ Азаматтық авиация комитеті Оман авиациялық билігімен бірлесіп «Salam Air» әуекомпаниясының тұрақты жолаушылар рейстерін ашу мәселесін пысықтады.

Осылайша, «Salam Air» 2023 жылғы 1 шілдеден бастап А–320neo және А-321neo типті әуе кемелерінде аптасына 2 рейс (бейсенбі және жексенбі) жиілігімен Маскат-Алматы бағыты бойынша тікелей тұрақты рейстерді орындауды бастауды жоспарлап отыр.

Қазақстан мен Оман арасында әуе қатынасының ашылуы елдер арасындағы сауда-экономикалық, туристік және мәдени ынтымақтастықты дамытуға ықпал ететін болады». Индустрия және инфрақұрылымдық даму министрлігінің баспасөз қызметі осылай мәлім етті.

«Salam Air» Омандағы қызмет құны аса қымбат саналмайтын әуекомпанияларының бірі. 2016 жылдан бері әуеге ұшақ ұшырып келе жатқан компания әлемнің 20 еліне халықаралық рейстерді орындайды.

JQ-Aqparat