Қант өндіруді 180 мың тоннаға жеткізу қажет

Елімізде 2026 жылға қарай қант өндірісін 180 мың тоннаға жеткізу керек. Жетісу облысында жұмыс сапарымен жүрген Премьер-министр Әлихан Смайылов Көксу қант зауытының тыныс-тіршілігімен танысуға барғанда осылай деді.

Үкімет басшысы қант қызылшасын өсіретін егіс алқаптарының көлемін кезең-кезеңімен ұлғайтып 15 мың гектарға жеткізудің кешенді жоспары қабылданғанын, қант өндірушілерге мемлекет тарапынан үлкен қолдау көрсетіліп келе жатқанын айтты. Жетісу облысы да 2026 жылға қарай жиналған өнімнің көлемін 525 мың тоннаға жеткізуді көздеп отырғанын да тілге тиек етті.
«Осыған байланысты жаңа алқаптарды өңдеп, суармалы жерлерді қалпына келтіру бойынша шаралар қабылдау маңызды. Сумен қамтамасыз ету бөлігінде су шаруашылығы объектілерін реконструкциялау жөніндегі шаралар көзделген. Қант зауыттары да жаңғыртылып, 2026 жылға қарай өндірілетін ақ қант көлемін 180 мың тоннаға дейін жеткізу қажет», — деген үкімет басшысы ауылшаруашылығы министріне бірқатар тапсырма жүктеп, мемлекет аграрлық саланы қаржыландыруға былтыр қомақты қаражат бөлгенін, биыл да сол сома бөлінетінін айтты.

JQ-Aqparat