Ірі көлемде есірткі тасушы құрықталды

Тараз қаласына ірі көлемдегі есірткі затын жеткізіп беруші күдікті ұсталды. Бұл жайында Polisia.kz хабарлады.

Жамбыл облыстық Полиция департаментінің есірткі қылмысына қарсы іс-қимыл басқармасының қызметкерлері алдын ала ұйымдастырып жүргізген операциясы барысында есірткі заттарын өткізетін арнаны тапқан. Меркі ауданының 48 жастағы тұрғыны Тараз қаласына ірі көлемдегі есірткі затын жеткізуді жоспарлап отырған. Күдіктінің тұрғылықты жеріне жедел іздестіру іс-шараларын жүргізіп, 5 келі 864грамм гашиш пен 1 келі 280 грамм кептірілген марихуана табылған. «ҚР ҚК-нің 297-бабының 3-бөлігі (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) бойынша сотқа дейінгі тергеу амалдары басталғанын» мәлім етті Polisia.kz.