«Халық артисі» атағы қайта оралады

Биылдан бастап еліміздің мәдениет саласын дамытуға орасан үлесін қосып жүрген қайраткерлерге «Қазақстанның халық артисі» атағы берілетін болды. Мемлекет басшысы VIII сайланған парламенттің бірінші сессиясында сөйлеген сөзінде «Қазақстанның халық артисі» атағы Республика күнінде берілетінін атап өтті. Еліміздегі жоғары марапат бірнеше жылдан бері берілмей үзіліп қалған болатын.

«Тағы бір маңызды мәселе бар. Мәдениет саласындағы саясатты жан-жақты ойластырып жүргізу керек. Қазір бұл саланы өркендету үшін жаңа тұжырымдама жасалып жатыр. Бұл құжат еліміздің мәдени мұрасын сақтау, насихаттау және ұлттық бірегейлікті нығайту ісінде шешуші рөл атқарады деп сенемін. Шығармашыл зиялы қауым көпшіліктің көңілінен шығатын, мемлекеттің мүддесіне сай келетін туындылар ұсынады деп үміттенемін.

Адам капиталын тұрақты дамыту жылдам өзгеріп жатқан қазіргі әлемде табысты ел болудың басты кепілі болады деп санаймын. Біз ұлттың жаңа сапасын қалыптастыру арқылы әділетті мемлекеттің және үйлесімді қоғамның негізін қалаймыз. Мен «Қазақстанның халық әртісі» атағын қайта қалпына келтіру туралы шешім қабылдадым. Биыл қазан айында – Республика күнінде осы атаққа лайықты мәдениет қайраткерлерінің алғашқы тобы марапатталады», — деді Мемлекет басшысы.

JQ-Aqparat