Этнограф-ғалым: Беташардағы ерекшелік «таяқ ұстаудан» көрінеді

Әр өңірдің салт-дәстүріндегі ерекшеліктерді үнемі жариялап отыратын этнограф-ғалым Тәттігүл Қартаева бұл жолы Сыр өңіріндегі беташар туралы жазба жариялады деп хабарлайды JQ-Aqparat.

Ол өзінің әлеуметтік желідегі парақшасында Сыр өңіріндегі беташардың ерекшеліктеріне тоқталды.

«Сыр-Аралдағы беташардағы ішкі аймақтық ерекшелік «таяқ ұстаудан» көрінеді. Сыр-Аралдың батыс жағында келіншек басына жабатын жаулықты жалғайтын жаулық, мата ұшын «қамшы», Жалағаш, Тереңөзек, Сырдария жағында «тал шыбық», «қамыс», Сыр өңірінің шығысы Шиелі, Жаңақорған жағында «оқтауға» жалғап байлайды. Осылардың қайсысы болса да, шартты атауы – «таяқ»! Таяқ ұстау мәртебесі бойдақ жігітке бұйырады. Беташар соңында «қамшы, тал шыбық, қамысты» келіншегің жұмсақ болып, бізге иіліп тұрсын деп үйленген жігітке ұстатса, оқтауды қолданатын аудандар ас-суға иелік ет деп келінге табыстайды. Суретте таяқ қызметін атқарған «қамыс қурайы», -деді белгілі этнограф.