Есірткі арнасының жолы кесілді

Алматы қаласының полиция қызметкерлері есірткі затын сатушылардың қылмыстық тобын құрықтады. Polisia.kz жазуынша, есірткі қылмысына қарсы күрес бөлімінің мәліметінше, полицияның арнайы жасағымен бірлесіп жүргізілген іс-шарада 5 адам ұсталған. Бесеуі де Жамбыл облысы, Шу ауданының тумасы. Қалқаман ықшам ауданынан ұсталған 46 жастағы күдіктіні тінтігенде сығымдалған гашиш салынған төрт бума, 1 миллион 150 мың теңге ақша ІІО зейнеткерінің жалған куәлігі табылды. Арнайы іс-шара нәтижесінде заңсыз айналымнан 34 келіге жуық гашиш тәркіленді. Алматы қалалық полиция департаменті есірткі қылмысына қарсы күрес басқармасының бастығы Ерлан Әлмағамбетов күдіктілердің қамауға алынғанын хабарлады. Осылайша полицейлер есірткінің Алматыға қандай жолмен жеткізілетінін анықтап, тосқауыл қойды. Полиция департаменті «ҚР ҚПК-нің 201-бабының талаптарына, сондай-ақ ҚР Конституциясының нормаларына сәйкес, қылмыстық іс бойынша өзге де мәліметтер жария етуге жатпайтынын» ескертті.

JQ-Aqparat