Елбасы: Қазақстан Сирияға қатысты келіссөз үшін барлық жағдайды жасайды

Қазақстан Сирияға қатысты келіссөзге қатысатын барлық тарапты Астанада қабылдауға, бұл үшін барлық қажетті жағдайды жасауға әзір, — деді Қазақстан Президенті Нұрсұлтан Назарбаев РФ Президенті Владимир Путинмен кездесу барысында, деп хабарлады  РИА Новости.  «Сіздің ұсынысыңыз туралы мәселе шешімі: Қазақстан Астанада келіссөз үшін тараптарды қабылдауға әзір. Біз кеше сізбен, Ердоғанмен (Түркия Президенті) және Руханимен (Иран Президенті) сөйлестік. Олар келісті. Біз олар кездесіп, жағдайды пысықтауы үшін барлық жағдайды жасаймыз», — деді Назарбаев. Президент Путин бұдан бұрын түрік көшбасшысы Тайып Ердоғанмен Сирияда қақтығысушы тараптарға Астанада жаңа алаңда бейбіт келіссөз үдерісін жалғастыруды ұсыну жайлы уағдаласқанын хабарлаған. Оның айтуынша, бұл Женева келіссөздерін толықтырады. Қазақстан Президенті Назарбаев ұсыныспен келісті. Кремль баспасөз қызметінің хабарлауынша, Путин мен оның ирандық әріптесі Хасан Рухани телефонмен сөйлесу барысында Алеппоны азат ету операциясын сәтті аяқтау Сириядағы терроризмді толықтай жеңу жолындағы маңызды қадам болып табылатынын атап өткен.

ҚазАқпарат