Доллар арзандағанда тамақ неге қымбаттайды?

Доллар біраз арзандағанмен, азық-түліктің құны керісінше көтеріліп бара жатыр. Дүкенде тауар мен дәрі-дәрмектің бағасының шарықтап кеткені депутаттарға енді жеткендей. Бүгін Үкімет пен Бас прокуратураның атына сауал жолдаған мәжілісмен Тұрғын Сыздықов 24 тауар түрінің екі есеге қымбаттағанын айтты…

31.kz хабарлағандай, күн сайын доллар төмендегеніне қарамастан, азық-түлік пен тұрмыстық тауар бағасы аспандамаса арзандаған жоқ. Дәрі-дәрмектің де екі-үш есеге қымбаттауы қарапайым халықтың қалтасын қағып отыр. Бүгін парламент қабырғасында депутаттық сауал жолдаған Тұрғын Сыздықов халыққа ең қажетті қант, жұмыртқа, картоп сияқты азықтардың екі-үш есе өскенін айтты. Бағасы бір келі етпен бірдей болған қызанақ пен қиярдың да әзірге арзандайтын түрі жоқ. Ал жолдың жабықтығын сылтауратып сатушылар еттің бір келісін 2 мың теңгеге саудалап жатқаны да айтылды. Ал бағаны реттейміз деп жергілікті биліктің жасаған меморандумдарынан да түк пайда жоқ деді депутат. Және қымбатшылықты жасап отырған делдалдардың көзін құрту жолдарын ұсынды…

— Жергілікті билікке әлеуметтік дүкендердегі, сауда бөлімдеріндегі, коммуналдық нарықтағы бағаны реттеуді, тауардың сапасы мен санын тексеруді міндеттеу керек. Отандық өнімдерді базардағы сауда орындарына тікелей жеткізу мәселесін қарастыру қажет.