Бішкекте ұсталған О.А. қайтыс болған адамның төлқұжатын пайдаланған

Елімізде қаржы пирамидасын құрып, оған басшылық жасаған О.А. есімді азаматтың елден қашып кеткенін, жуырда Бішкектен табылғанын жазған едік. Өткенде ол Алматыға жеткізіліп, қамауға алынды.

Енді оның қалай ұсталғаны, көрші елде не бүлдіргені туралы ақпарат шықты. 24.kg жариялаған Бішкек ішкі істер департаментінің хабарламасында О.А. 2000 жылы қайтыс болған қырғыз азаматының төлқұжатын алып, бірнеше рет пайдаланғаны айтылған.
Бішкекке барып бас сауғалаған қашқынға тіркеу мекемесінің лауазымды тұлғалары көмек көрсеткен. Сол кезде төлқұжатты заңсыз дайындап бергені үшін Бішкек қаласы Октябрь аудандық тұрғындарды тіркеу департаментінің паспорт-виза бөлімінің жетекші маманы (әйел адам) анықталып, қамауға алынды.

Оған қоса, біздің қашқын есірткі заттарын сақтағаны үшін жауапқа тартылып, 150 мың сом айыппұл төлеген.
Толық есімін жазбай, О.А. деп жұмбақтап қойған азаматтың кім екенін jasqazaq.kz кішігірім зерттеу жүргізіп, анықтаған болатын

JQ-Aqparat