Баландин да келді Алматыға

Ел тарихында Олимпиадада тұңғыш рет жүзуден алтын алған 21 жастағы Дмитрий Баландин бүгін Алматыға оралды.

Бразилияның Рио-де-Жанейро қаласында өтіп жатқан XXXI жазғы Олимпиада ойындарында жүлделі оралған Олимпиада чемпионын халықаралық әуежайдың VIP-терминалында Алматы қаласының әкімі Бауыржан Байбек, ҚазҰУ ректоры Ғалым Мұтанов, сондай-ақ Дмитрий білім алатын осы әл-Фараби атындағы ҚазҰУ студенттері, спорт саласындағы ұйымдардың өкілдері, жас спортшылар, қала тұрғындары — барлығы 300-ден астам адам зор қуанышпен қарсы алды.

Өз кезегінде Дмитрий Баландин «Бізге қолдау көрсеткендеріңізге шын жүректен алғысымды білдіремін. Сіздердің қолдауларыңызды біз қашанда сезініп жүрдік. Мен үшін елімізді әлемге таныту, көк Туды желбірету асқан мәртебе», — деді. Дмитрий Баландинмен бірге Алматыға оның ата-анасы мен жеке бапкері Алексей Казаков, сондай-ақ, шалқалап жүзуден қазақстандық спортшы Екатерина Руденко, бас жаттықтырушы Олег Вагизов ұшып келді.