Бала жоғалып табылды (Видео)

Екі күннен бері іздестіріліп жатқан жасөспірім табылды деп хабарлайды JQ-Aqparat Polisia.kz-ке сілтеме жасап.

Солтүстік Қазақстан облысы, Уәлиханов ауданында полиция бөліміне 10 жастағы баланың жоғалып кеткені туралы хабарлама түседі. Полиция қызметкерлері, өрт сөндіру қызметі, төтенше жағдайлар бөлімі, аудан әкімдігінің қызметкерлері, жергілікті тұрғындар, облыстық полиция департаментінен екі іздеу тобы келіп шұғыл іздестіру жұмыстарын жүргізеді. Жасқайрат, Қайрат, Қулыкөл ауылының тұрғындары да жасөспірімді табуға күш қосады. Баланы бос тұрған үйдің бірінен Жауар ауданының инспектор-кинологы О.Нұрлан қызметтік-іздестіру итінің көмегімен тапқан.

«Бала дереу медициналық мекемеге жеткізілді, қазір дәрігерлер оны қарап жатыр. Ювеналды полиция қызметкерлері оқиғаның барлық мән-жайын анықтап жатыр, отбасымен жұмыс жүргізіледі», – деді Уәлиханов аудандық ішкі істер бөлімінің басшысы Р.Әлижанов. Полиция бөлімінің бастығы іздестіру жұмысына жұмыла кіріскен аудан тұрғындарына алғысын жеткізді.