Бүгінге дейін 157 мың адам тіркелді

2017 жылдың 7-13 қаңтары аралығында тұрғылықты жері бойынша тіркелген қазақстандықтардың саны 157 778 адамды құрайды. Бұл туралы ҚазАқпарат ҚР Ішкі істер министрлігінің баспасөз қызметіне сілтеме жасап хабарлайды. «Осы жылдың 7-13 қаңтары аралығында 157 778 азамат, оның ішінде 79 412-сі тұрақты және 78 366-сы уақытша тұрғылықты жеріне тіркеуге тұрды. Тек 13 қаңтарда ғана 30 069 адам, оның ішінде 14 523-і тұрақты және 15 546-сі уақытша тұрғылықты жеріне тіркеуге алынды», — делінген министрлік хабарламасында. Естеріңізге сала кетейік, 2016 жылдың 22 желтоқсанында Мемлекет басшысы экстремизм мен терроризмге қарсы іс-қимыл жөніндегі шараларды күшейтуге бағытталған «Қазақстан Республикасының кейбір заңнамалық актілеріне экстремизмге және терроризмге қарсы іс-қимыл мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойды. Аталған Заңға сәйкес азаматтар тұрғылықты жерінде тіркеуге тұруға міндетті.