Аустралия төріндегі тарихи жеңіс: Рыбакина финалда!

26 қантар 2023, 17:02

Қазақстандық теннисші Елена Рыбакина Аустралия ашық чемпионатының финалына шықты. Мельбурн қаласында өтіп жатқан айтулы доданың жартылай финалында Рыбакина беларусь теннисшісі Виктория Азаренконы ұтты. Тартысты ойын 1 сағат 21 минутқа созылды.

Аустралия ашық чемпионаты үлкен дулыға санатына жататын мәртебелі доданың бірі. Елена Рыбакина былтыр үлкен дулыға додасының бірі Уимблдонның чемпионы атанған болатын. Биыл міне Аустралия ашық чемпионатының финалына шықты. Қазақстан теннисшілерінің арасынан үлкен дулыға додасының финалына шыққан тұңғыш спортшы Елена Рыбакина.

Бұл додада жерлесіміз әлемнің бірінші ракеткасы поляк Ига Швентекті жеңді, жартылай финалдағы қарсыласы Виктория Аазаренконың атағынан ат үркеді. Ол Australian Open турнирін екі рет ұтқан, Лондон жазғы Олимпиадасының чемпионы. Финалда Еленаның кімге қарсы кортқа шығатыны беларусь қызы Арина Соболенко мен поляк Магда Линетт арасындағы тартыстан кейін нақтыланады.

JQ-Aqparat