Аулада ойнап жүріп жоғалып кеткен 4 жасар бала өлі табылды (Видео)

30 желтоқсан 2022, 13:48

Ақтөбеде аулада ойнап жүріп жоғалып кеткен 4 жасар Данил Ахунов өлі табылды. Бұл туралы Tengrinews.kz хабарлайды.

Бұл туралы Zello help еріктілер тобы хабарлады.

«Осымен бітті. Кішкентай баланы іздеуге көмектескен барша жанға алғыс айтамыз. #ZELLOPOISK командасы баланың отбасы мен жақындарына қайғыра көңіл айтады», — делінген хабарламада.

Іздеу шараларының нәтижесінде 28 желтоқсанда жоғалып кеткен 2018 жылы туған Данил Ахуновтың зорлықпен өлім белгілері бар денесі табылды. Күдікті ұсталып, УҰИ-ға қамауға алынды.

Қылмыстық кодекстің 99-бабы 3-бөлігі «Жас баланы өлтіру» бойынша сотқа дейінгі тергеу жүргізіліп жатыр.

Қылмыстық істі тергеп-тексеру шеңберінде өзге ақпарат жария етілмейді.

Еске салайық, 29 желтоқсанда 4 жасар Данил Ахунов таңертең аулада ойнап жүрген жерінен жоғалып кеткені хабарланған болатын. «Диапазон» мәліметінше, баланы әкесі таңғы сағат 9:30 шамасында үйінің кіреберісінде қалдырып кеткен.