Әскерилердің жалақысы көтеріледі

Қорғаныс министрінің орынбасары Сұлтан Қамалетдинов биыл бірқатар әскери қызметкердің жалақысы көтерілетінін айтты.

Сенат отырысынан кейін журналистердің сауалына жауап берген вице-министр: «Әскери-әуе күштерінің ұшқыштарына бөлінетін қаржы көлемі ұлғайтылды. Одан басқа, жыл соңына қарай әскери жоғары оқу орындарының профессорлық-оқытушылық құрамының жалақасын азаматтық жоғары оқу орындарындағы деңгейге дейін көтеру бойынша мәселе шешімін табады. Әскери медицина саласында қызмет ететіндерге бөлінетін қаржыны да азаматтық сектордағы медқызметкерлер деңгейіне дейін көтеру ұсынысын Үкімет қолдады», — деді.

Биыл әскерилердің жалақысы 30 пайыздан астам мөлшерге көтеріледі деп жоспарланып отыр.
Еске сала кетейік, бұған дейін сенаторлар мақұлдаған әскери полицияға қатысты жаңа заңда «қызметкер» сөзі қолданылмайтыны туралы жазған болатынбыз. Жаңа заң жобасы «Қазақстан Республикасының кейбір заңнамалық актілеріне әскери полиция органдары және қорғанысты ұйымдастыру мәселелері бойынша өзгерістер мен толықтырулар енгізу туралы» деп аталады. Заң Мәжіліс қабылдаған «Әскери полиция органдары туралы» заңның ережелерін іске асыру мақсатында әзірленген.

JQ-Aqparat