Қашағанда коммерциялық өндіріс басталды

21 қараша 2016, 16:35

snimok

Қашаған кен орнынан мұнай өндіру көлемі қараша айында тәулігіне 75 мың баррельге дейін жетті. Бұл туралы Мәжілісте өткен үкімет сағаты барысында энергетика министрі Қанат Бозымбаев мәлімдеді.

Tengrinews.kz хабарлағандай, «2016 жылдың 28 қыркүйегінде Қашаған кен орнында қайтадан мұнай өндіріле бастады. 14 қазанда «ҚазТрансОйл» және КҚК (Каспий құбыр консорциумы) құбыр жүйесі арқылы тауарлық мұнайдың алғашқы партиясы жөнелтілді және «Интергаз Орталық Азия» газ құбыры арқылы тауарлық газ жеткізілді. Биыл 1 қарашада Қашаған жобасы коммерциялық мұнай шығару деңгейіне жетті, басқаша айтқанда, тәулігіне 75 мың баррельден асты», -деді Қанат Бозымбаев.

Оның айтуынша, 2016 жылдың 19 қарашасында кен орнында 450 мың тонна мұнай шығарылды. Жыл соңына дейін 1,1 миллион тонна мұнай шығару жоспарланып отыр.