Қарияны қан қақсатқан алаяқтар құрықталды

Ақмола облысында зейнеткердің 1,5 миллион теңгеге жуық ақшасын қолды қылған алаяқтар тобы құрықталды, деп хабарлайды «ҚазАқпарат» тілшісі облыстық ІІД баспасөз қызметіне сілтеме жасап.  Полицейлердің мәліметі бойынша, 2016 жылдың 30 қарашасында Шортанды аудандық ІІБ полицейлері телефон арқылы алаяқтық жасаған күдіктілерді қолға түсірді.  Күдіктілер — Степногор қаласының тұрғындары. Бұл жолы ұйымдасқан топ Шортанды кентінің тұрғыны, 60 жастағы зейнеткерге телефон арқылы қоңырау шалып, ұлының біреуді көлікпен қағып кеткенін айтқан. Жасамаған қылмыстық істен құтылуы үшін   1 360 960 теңге көлемінде ақша сұраған. Телефон тұтқасының арғы жағында баласынікіне ұқсас дауысты естіген зейнеткер көп ойланбастан алаяқтарға сұраған ақшасын қолдарына ұстата салған. Кейін полицейлер анықтағандай сол кезде қарияның баласы Астанада болған жəне ешкімді де көлікпен қақпаған.  Жедел іздестіру шарасы барысында полицейлер жергілікті такси жүргізушісі арқылы күдіктілердің ізіне түсіп, қолға түсірді. Тергеу амалдары кезінде алданған зейнеткер олардың бірін  таныды.  Қазіргі кезде, күдіктілер Шортанды аудандық ІІБ уақытша ұстау оқшаулағышына қамалып, үстерінен ҚР ҚК 190-бабының 3-бөлімі «алаяқтық» бойынша қылмыстық іс қозғалды.

ҚазАқпарат