Алматыда 80 жастағы анасын бес жыл бойы қамауда ұстаған

Алматыда 80 жастағы Лидия Водопьянованың көршілері оның бес жыл бойы өз үйінде қамауда жатқанын айтуда. Кейуананы сол жерде өгей қызы қамап отырған-ды.

NUR.KZ хабарлағандай, көршілердің айтуынша, кейуана өткен-кеткеннен тамақ сұрап, егіле жылаумен болады екен.

«Оның қызы екі айда бір рет келеді. Оған қарайласпайды. Кейуана қашан да аш жатады», – дейді Гүлжан Жармұхмабетова.

«Ол жер өте лас әрі тастай суық. Біз бәріміз жабыла тамақтандырамыз», – дейді өзге көршісі Ирина.

Әйелдердің сөзіне сенсек, кейуана көмек сұрап, жылай береді. Көршілерінен біресе бір үзім нан, біресе сіріңке сұрап жатады. Көршілер талай рет полиция шақыртқанымен, олар әжесіне туыстары қарауы тиіс деп қолды бір сілтейтін көрінеді.

«Науқас болғандықтан, маған ешкім қарайласпайды. Мен ішкілікке салынғандардың қатарынан емеспін, өмір бойы жұмыс істеп келдім», – дейді Лидия Водопьянова.

Қақпа жабық болғанымен, журналистер ішке кіре алды. Кейуана тұратын үйдің жағдайын көрген олар аң-таң болған.

80 жастағы Лидия Станиславовна бұл жайтқа ешкімді кінәламайды. Тек аздап көмек сұрауда.

Кейуана бар сұрақтарға жауап бергесін, журналистерден біраз уақыт қасында бола тұруын сұрады. Адамдардың қарайласуы жетпей тұрғаны бірден сезіліп тұр. Келесі күні зейнеткерге полицейлер мен әлеуметтік қызметкерлер келді.

Өгей қызы Еленаны да көру мүмкіндігі туды. Ол өгей анасы Альцгеймер дертіне шалдыққанын, оңай жоғалып кетуі мүмкін екенін, ал тамақты күн-түн демей сұрай беретінін алға тартты.

«Ол тамақ жегенін ұмытып қала береді. Үйден бірнеше рет кетіп қалған болатын, сол арада көлік қағып кетсе қайтеміз? Біз оны бір рет жоғалтқан болатынбыз», – дейді зейнеткердің өгей қызы Елена Водопьянова.

Елена қақпаны ұрылар кіріп кетпеуі үшін жапқанын айтуда. Ал емханаға зейнеткерді жасына бола қабылдамайды-мыс. Ол бүгінде кейуананы қамқорлыққа алу үшін құжаттарды реттеді. Елена ендігі өгей анасына жақсырақ қамқор болуға уәде етуде.