«Алматы Тауэрс» өрт құрбандарының отбасыларына 3 млн. теңгеден төлейді

«Алматы Тауэрстегі» өрт кезінде қаза болғандардың отбасыларына 3 млн. теңгеден материалдық көмек көрсетіледі. Бұл туралы оқиға болған жерде Алматы әкімі Бауыржан Байбекке «Алматы Тауэрс» басқарушы компания өкілі Аблимит Рахматуллаев баяндады.

Қала әкімі қаза болғандарға көңіл айтып, олардың отбасыларына жан-жақты қолдау көрсетуді тапсырды. «Қазіргі кезде оларға барынша үлкен көмек көрсетіп, жерлеу мен оған кететін шығындар мәселелерінің барлығын шешу қажет. Ешкім назардан тыс қалмасын. Комиссия барлық тексеру жұмыстарын ашық және жариялы түрде жүргізеді. Қысқа мерзім ішінде толық есеп берілуі тиіс», — деп атап өтті Б.Байбек. Өз кезегінде «Алматы Тауэрс» басқарушы компания өкілі өрт кезінде қаза болғандар отбасыларына бүгіннен бастап материалдық көмектің берілетінін айтты. «Осы қайғылы оқиға барысында мерт болғандардың отбасыларына көңіл айтамыз. Біздің компания басшылығы барлық қайтыс болғандардың отбасыларына 3 млн. теңгеден қаржылық көмек көрсету туралы шешім қабылдады. Бұл төлемдер бүгіннен бастап беріледі», — деді А.Рахматуллаев. «Батутный центр» ЖШС директоры Даурен Тұяқов жерлеу рәсіміне көмек көрсетіп, зардап шеккендерге өтемақы төлейтіндіктерін жеткізді. Қаза болғандар оқитын ЖОО-да материалдық көмек көрсететін болады.

Алматы қаласы Төтенше жағдайлар Департаментінің бастығы Серік Әубәкіров өрттің шығуына қатысты қайғылы оқиғаның дәнекерлеу жұмыстары барысында қауіпсіздік ережелерінің сақталмауынан немесе апатты жағдайдағы электрқондырғыларынан болуы мүмкін деген екі болжамның қарастырылып жатқандығын айтты. «Әкім өрттің неден болғандығын жете тексеру жөнінде тапсырма берді. Осыған орай, оқиға орнында ТЖД-нің арнайы зертханасы жұмыс істеуде. Оқиға орны тексерілді, оны ҚР ІІМ-інің өрт қауіпсіздігі Институты мен Төтенше жағдайлар жөніндегі азаматтық қорғаныс комитетінің арнайы мамандары жүргізді», — деп атап өтті С.Әубәкіров. Бұдан өзге, Алматы қаласы ІІД бастығының орынбасары Ізбасар Бектұров қайғылы оқиғаға қатысты 292 тараптың 3 тармағы (өрт қауіпсіздігі ережесінің сақталмауы салдарынан екі және одан да көп адамның қаза болуы) бойынша қылмысты іс қозғалғандығынан хабардар етті. Тергеу шаралары жүргізіліп, қаза болғандардың жеке бастары анықталды.

inform.kz