Ақтаудың әкімі 172 500 теңге төлейді

Сот шешімін орындамаған Ақтаудың әкімінен ақша өндірілетін болды.   

Маңғыстау облысының мамандандырылған ауданаралық әкімшілік сотының шешімімен ЖШС-тің Ақтау қаласының әкіміне қатысты талабы қанағаттандырылған. Атап айтсақ, сот шешімімен жауапкердің жер учаскесінің нысаналы мақсатын өзгертуден бас тартуы заңсыз деп танылып, жердің нысаналы мақсатын өзгертуді, яғни бір ай ішінде ЖШС-нің пайдасына қолайлы әкімшілік акт қабылдау міндеттелген.

Бірақ бүгінге дейін сот шешімі орындалмаған.

Әкімшілік кодекстің талаптарына сәйкес, сот шешімдерін орындау соттың бақылауында және оларды орындаудан жалтарса, 50 АЕК мөлшерінде ақшалай өндіріп алынады.

Сот ұйғарымымен Ақтау қаласының әкіміне қатысты 50 АЕК мөлшерінде, яғни 172 500 теңге ақшалай өндіріп алу шарасы қолданылды.

Маңғыстау облысының мамандандырылған ауданаралық әкімшілік сотының баспасөз қызметі таратқан хабарламада: «Әкім оны 5 күн ішінде төлеп, сот шешімін 10 күн ішінде орындауы керек. Әйтпесе, ақшалай өндіріп алу 10 АЕК-ке ұлғайтылады» делінген.

JQ-Aqparat