«Айбоз» ұлттық сыйлығы тағайындалады

Биыл жас қаламгерлерді қолдау мақсатында арнайы Президенттің әдеби сыйлығы тағайындалады. Мәдениет және спорт министрлігінің кеңейтілген алқа отырысында ведомство басшысы Асхат Оралов осылай деді.

«Төл әдебиетімізді жаңа дүниелермен толықтырып, ұлтымыздың әдеби мұрасын молайтып, отандық әдебиетке, баспа ұйымдарына тың серпін беруді көздейтін «Айбоз» ұлттық әдеби сыйлығы тағайындалды. Бұл бастамалардың бәрі отандық өнерге, мәдениет пен әдебиетке тың серпін сыйлаған жобаларға айналды. Рухани қазынамыз көптеген жаңа туындылармен толықты. Енді осы игі дәстүрді одан әрі өрістету мақсатымен биыл жаңа жобаларды жүзеге асыруды көздеп отырмыз. Атап айтқанда, жас қаламгерлерді қолдау мақсатында арнайы Президенттің әдеби сыйлығы тағайындалады», — деді Асхат Оралов.

Министр әр номинация бойынша жеңімпаздарға 4 млн теңге көлемінде ақшалай сыйлық берілетінін айтты.

Алдағы уақытта мәдениет саласының қызметкерлері үшін халықаралық форум өтеді.
«Мәдениет қызметкерлерінің халықаралық форумын ұйымдастырамыз. Бұл сала мамандарының біліктілігін арттырып, халықаралық тәжірибені игеруіне мүмкіндік береді. Осы айтылған жұмыстардың жоғары деңгейде жүзеге асуына зиялы қауымның белсенді қатысуы өте маңызды. Қоғам мен жастардың тәрбиесінде аға буынның атқаратын рөлі зор», — деді министр.

JQ-Aqparat