Қабылан қастық жасады

Краснояр өлкесіне қарайтын Боготол қаласының тұрғыны шапито циркінде қабылан шабуылдаған соң, қолынан жарақат алып ауруханаға түсті, деп хабарлайды Риа Новости жергілікті денсаулық сақтау мекемесінің баспасөз қызметіне сілтеме жасап. Жергілікті БАҚ пен әлеуметтік желілерде оқиғаның арнайы қойылымдар кезінде болғандығы жөнінде ақпарат жүр. Ондағы мәліметтер бойынша, қабылан аң үйретушілерді тыңдамай көрермендер залына шығып кеткен. Әйел адам өзінің 6 жасар баласын жыртқыштан қорғамақ болып жарақат алған. Өңірлік полиция қызметкерлері агенттік өкілдеріне оқиғаның мән-жайын анықтап жатқандығын айтты. «Әйелдің жағдайы орташа. Қолы бірнеше жерінен тігілді. Красноярск қаласына апарудың қажеті жоқ. Қазір ол осы ауруханада ем алып жатыр»,-деді Денсаулық сақтау министрлігінің өкілі.

ҚазАқпарат