«Тапсырыспен кісі өлтіру». Елордада осындай жарнамасы бар көлік ұсталды (видео)

Нұр-Сұлтанда «тапсырыспен кісі өлтіру» деген жазуы бар көлік жүргізушісі ұсталды, — деп хабарлайды Tengrinews.kz.

Полиция өкілдері әлеуметтік желілерде бақылау жүргізіліп, тәртіп сақшылары көлікті бір сағат ішінде анықтағанын айтты.

«Жүргізушінің айтуынша, артқы әйнегінде «тапсырыспен кісі өлтіру» деген жазуы бар көлікті бір ай бұрын Петропавлда сатып алған. Бірақ жазуды өшірмеген. Құжаттарды тексеру кезінде 27 жастағы жүргізуші көлік құралын басқару құқығынан айырылғаны анықталды», — деді полиция өкілі.

Құқық қорғау органдары жүргізушінің кешірім сұраған видеосын жариялады.

«Техникалық регламент талаптарына сәйкес келмейтін әрекеті және көлік жүргізу құқығы жоқ бола тұра тізгінге отырған жүргізуші 590-баптың 5-бөлігі «көлік құралдарын пайдалану ережелерін бұзу» және 612-баптың 2-бөлігі «көлік құралын құжатсыз және басқару құқығы жоқ адамның басқаруы» бойынша әкімшілік жауапкершілікке тартылды», — деп толықтырды елордалық полиция департаменті өкілдері.